ألف وميم
ــــــــ
تحت الجميزة أتربيت
وعشت فى كل غيط
أكل من خير ترابك
وتسقيني بدم شبابك
الأم مش ألف وميم
الأم رحمة من الجحيم
ولما تكون الأم أرض
ينحني لها كل فرد
ينحني ويزرع ويحصد
ينحني من غير ما يرفض
ولما يرفع فيها قامته
يبقى قامت يوم قيامته
يبذل الروح والدم
ويقول ده فدا الأم
شايل كفنه على أيده
وما حد يقدر يحيده
كل المنى يحفظ ترابها
كل المنى يحفظ شبابها
أمي العجوزة المكركبة
أمي الشابة المتعصبة
منديلها أبيض بآوية
شغلته أختي وأخويا
ولا الطرحة اللي بالقصب
على الجبين بتتنصب
نفسي أشوفك تانى يا أما
زى زمان حواليكى لما
الكل ليكي جاى يبارك
فى أبنك اللى خاض معارك
جاى يقولك أوعى البكا
ده قصة أبنك بتتحكى
على أرض سينا والعريش
وفى الجنوب ميتنسيش
رفع رايتك وقال
الله وأكبر مفيش محال
أنا أبن بطن مصر
أنا اللي بنيت العصر
أنا البكري للست الكبيرة
السمرا الطيبة الأميرة
مواقع النشر (المفضلة)